HAZRAT MUHAMMAD MUSTAFA ﷺ KI SEERAT

Assalam Alaikum Wa-rehmatullah wa-barakatuhu

PARTI-PAIDAISH SAY 40 SAAL TAK

Quraish Makkay Mukarramah ka ek mashhoor qabila hai jo Hazrat Ismaeel a.s. ki aulaad mien say hain.

Qabila Quraish mein kayee baday baday khandaan thay un mein ek khandaan Bani Haashim ka tha, Haashim apnay khandaan mein baday muazzaz,sakhee aur mehmaan nawaaz shaks thay, Haashim kay betay Shaiba hai jo Abdul Muttalib say mashhoor huay, Abdul Muttalib kay betay Abdullah hai, Abdullah apnay baap kay mehboob betay thay unki shaadi qabilay quraish hi kay ek baday gharanay mein huyi unki biwi ka naam Aamina tha.(Jamia e Tirmazi : 3605)

Hazrat Bibi Aamina ne Khuwab Dekha ke Aik Noor Zahir hua Jis se Shaam ke Mohalla un ke Samnay Roshan ho gaye.(Mishkat : 5759) aur fir Unke Ghar bachcha paida hua jisnay andhayri duniya ko ujalay mein badal diya Arab ki sooti bastiyon ko jaga diya, Yehi woh bachcha hai Jis ko duniya MUHAMMADUR RASOOL ALLAH ﷺ Kay naam say Yaad Karti hain, Arab kay Dastoor kay Mutabiq Daayi Haleema nay Aap ﷺ ko doodh pilaya.(Tareeqi Riwayat).

Aur Dusri Turruf mein Abu Lahab ki Londi Sobiya Raziallahu Anho ne Dhoodh Pilaya Aaya hain.(Sahih Bukhari : 5101).

Aap ﷺ Jab 6 saal kay huay to Aap ﷺ ki walidah ka inteqaal hogaya aur Aap ﷺ kay us duniya mein tashreef laanay say pahlay hi Aap kay walid ka inteqaal hogaya tha aur Aap 8 saal 2 mahinay 10 din kay huay to dada Abdul Muttalib ka bhi inteqaal hogaya. Phir Aap ﷺ kay chacha Abu Talib kay saath Mulk e Shaam ka pahla safar kiya.

Quraish kay loog Aap ﷺ ko Ameen aur Sadiq kehtay thay, isliye Aap ﷺ Amanatdaar aur Sachchay thay Hazrat e Khadija (R.A.) nay Aap ﷺ ko maal tijarat say kar Mulk e Shaam rawana kiya, Aap ﷺ nay poori Amanatdaari say tijarat ki Aap ﷺ kay akhlaaq say woh bay-had mutasir huyi, kuch arsa kay baad Hazrat e Khadija (R.A.) nay nikaah ka paighaam bheja, Aap ﷺ nay manzoor farmaya, nikaah kay waqt Huzoor ﷺ ki umar 25 saal aur Hazrat e Khadiya ki umar 40 saal thi, Aap ﷺ kayee-kayee din ka khaana - paani lay kar ek pahaad kay ghaar jis ka naam Ghaar e Hira tha tashreef layjaatay thay aur wahaan Allaah ki ibadat kartay thay.

PART II - 40 SAAL SAY 53 SAAL TAK

Jab Aap ﷺ ki umar 40 saal ki huyi to Hazrat e Jibraeel (A.S.) Ghaar e Hira mein tashreef laaye aur Aap ﷺ ko us baat ki basharat di kay Aap ﷺ Allaah kay Rasool hai Quraan e Majeed ki pahli ayatein " iqra bismi rabbikal lazee khalaq - khalaqal insaana min alaq" nazil huyi, Aap ﷺ nay pahlay-pahlay chupay-chupay islaam ki dawat di, sub say pahlay Aap ﷺ ki biwi Hazrat e Khadija (R.A.) nay islaam qubool kiya, mardon mein Hazrat e Abu Bakar Siddiq (R.A.), ladkon mein Hazrat e Ali (R.A.) aur khadimo Zaid bin Harisah (R.A.) nay islaam qubool kiya.

Rafta-rafta islaam ki awaaz loogon kay kaano mein padhnay lagi, 3 saal tak barabar chipay-chipay islaam ki tableegh hoti rahi, is arsay mein 30-35 aadmiyon nay islaam qubool kiya, Kaaba kay qareeb ek gali mein Hazrat e Zaid bin Arqam (R.A.) kay makaan mein Huzoor ﷺ aur tamaam musalmaan jama hokar Allaah ki ibadat kartay thay. 3 saal baad khullam - khulla islaam ki dawat di gayi, uskay saath hi Huzoor ﷺ aur Aap ﷺ par emaan laanay walon par takleefon aur e'zaaon ka silsila shuruh hogaya.

Hazrat e Hamza (R.A.), Hazrat e Umar R.A.) wa ghairah nay bhi islaam qubool karliya, Arab kay sardaaron wa ghairah ki takleefon say tang aakar sab say pahlay Huzoor ﷺ kay kukum say Habsha (ek shaher) ki taraf chand sahaba aur sahabiyaat (R.A.) nay hijrat ki, usi zamanay mein Aap ﷺ nay Taif (ek shaher) ka tableeghi safar farmaya aur meraaj ka woh hairat-angeez waaqiah pesh aaya jis ko hum baar-baar suntay hai, Makka kay loogon ki takleefon aur e'zaaon ki ziyaadati nay sahaba ikraam (R.A.) ko majboor kardiya tha kay woh Makka choor kar kahein chalay jaayein to Huzoor ﷺ ki ijazat say sahaba ikraam (R.A.) nay Habsha aur Madinah Munawwarah ki taraf hijrat ki yahaan tak kay ab Makka mein Huzoor ﷺ Hazrat Abu Bakar (R.A.), Hazrat Ali (R.A.) aur chand kamzoor musalmaan kay siwa koi na tha, us tarah Aap ﷺ nay paidaish say 53 saal tak Makkay Mukarramah mein apni zindagi guzari yaani nabuwwat kay milnay kay 13 saal tak musalsal takleefon ko bardasht kartay huay Makkay Muazzamah mein zindagi guzari.

PART III-53 SAAL SAY 63 SAAL TAK

Nabuwwat kay terway 13 saal jab kay Aap ﷺ ki umar 53 saal thi, Aap ﷺ nay Hazrat Abu Bakar (R.A.) kay saath Makka say Madinah ki taraf hijrat farmayi, Aap ﷺ ki hijrat kay saal say hi islaami sun hijri ka hisaab shuru hota hai, us tarah hum aasani say pahchaan saktay hai kay Huzoor ﷺ ki hijrat huay kitnay baras huay. Hijrat kay dauraan Aap ﷺ nay Madinah Munawwarah say taqreeban 30 meel kay faaslay par ek choti si basti jis ka naam Qubaa hai, qiyaam farmaya aur wahaan ek masjid tameer farmayi jis ka naam 'Masjid e Qubaa' hai.

OLD PICTURE MASJID E QUBAA'

NEW PICTURE MASJID E QUBAA'

Madinah kay ansaar nay Aap ﷺ ka pur josh isteghbaal kiya, Aap ﷺ nay Hazrat Abu Ayyuub Ansaari (R.A.) kay ghar mein qiyaam kiya farmaya, Madinah Munawwarah mein 2 yateem bachchon ki zameen thi Aap ﷺ nay us zameen ko khareed kar us mein masjid tameer farmayi jo aaj bhi 'Masjid e Nabawi' kay naam say mashhoor hai, 

Huzoor ﷺ nay Makka say hijrat karnay walay muhajireen aur Madinah kay ansaar mein bhai charagi ka silsilah qaaim farmaya.

Hijrat kay doosray saal 'Gazway Bada'r pesh aaya jis mein sirf 313 musalmaan thay aur kaafir hatyaaron say lais 1000 ki tadaad mein thay, us jung mein musalmaano ko kamiyaabi mili, 70 kaafir maaraygaye aur 70 qaid huay sirf 14 musalmaano nay shahadat ka muqaam paya.

JUNG E BADR AREA PICTURE

Sun 2 hijri mein Huzoor ﷺ ki sahabzaadi (ladki) Hazrat Fatima (R.A.) ka nikaah Hazrat Ali (R.A.) say hua, sun 3 hijri mein 'Jung e Uhad' huyi jis mein pahlay to ek hazaar musalmaan thay aur phir 300 munafiq maidaan say nikal gaye, sirf 700 musalmaan rah gaye thay, jung kay shuru marhalay mein musalmaano kay qadam ukhad gaaye, usi jung mein Huzoor ﷺ kay dandaanay mubarak (teeth) shaheed huay, aur 70 musalmaan shaheed huay.

Sun 6 hijri ko Hudaibiyah ki sulah huyi, sun 8 hijri ko Makka fatah hua aur musalmaan fateh ki haisiyat say Makkay Mukarramah mein dakhil huay, usi saal 'Jung e Hunain' bhi huyi, sun 9 hijri ko 'Jung e Tabook' huyi, sun 10 hijri ko Huzoor ﷺ nay aakhiri hajj farmaya, usi aakhiri hajj kay mauqay par Aap ﷺ nay Arfaat kay maidaan mein woh tareekhi khutbah diya jis ka har har lafz ummat kay liye pesh baha khazana hai.